I SUNDOWNS IQINISEKISA EZOKUGQASHUKA KWEGODA PHAKATHI KWAYO NO MOKWENA

I Mamelodi Sundowns isiwaqinisekisile amahlebezi abeloku evunguza, okuthi liyagqashuka igoda phakathi kwayo nomqeqeshi u Rhulani Mokwena. 

Isitatimende esikhishwe yi Sundowns sithi yona njengeqembu kanye no Mokwena, bavumelene ukuthi bathathe izindlela ezihlukene. Iyambonga ngakhokonke ayenzele kona kulesikhathi engumqeqeshi wayo futhi uyohlala eyilunga lomndeni wayo. Ithi imfisela okuhle kodwa lapho eyakhona. Ibe isikucacisa ukuthi lesinqumo sithathwe ngokuhlanganyela yibhodi elengamele iqembu, asivelanga kumuntu oyedwa.

Okwamanje uManqoba Mngqithi nethimba asebenzisana nalo, ibona abazoqhubeka nokubamba amatomu kuleliqembu njengoba lizilungiselela isizini ezayo.