KUZOKHULEKELWA OWAMA CROWN AWARDS

Kulindeleke izinkumbi zabathandi bomculo wokholo ukuthi zibe yingxenye yenkonzo yokukhulekela uZanele Mbokazi,ongumsunguli wama Crown Awards.

UZanele ophinde abe ngumsakazi ku Khozi FM, uphumele obala ngezindaba zokugula kwakhe emasontweni ambalwa edlule kulandela ukuthi ebe nenkinga ngesikhathi ethula uhlelo lwakhe olungena ngesonto ekuseni. Umyeni wakhe u Bishop. Nkambule ngokubambisana nezikhulu zoKhozi badalula ukuthi kutholakale ukuthi uhaqwe umdlavuza wamaphaphu nokuyiwona omnikeza inkinga yokuphefumula. Lezindaba azehlanga kahle kwabaningi,ikakhulu kubaculi kanye nakubathandi bomculo wokholo.

Kulomkhuleko ozobanjelwa esontweni i GNF, e Durban Station, mhla zingu 23 ku June,kulindeleke inqwaba yabaculi bowokholo abazobe behlinzeka ngendumiso, abaholi bamabandla ahlukene kanye nomphakathi jikelele. Eminye imininingwane ngalomkhuleko izomenyezelwa ekhasini lika Facebook lama Crown Gospel Music Awards.