UFIHLWE NGESIZOTHA ESIMFANELE U ZANELE MBOKAZI

Izinkumbi zabantu eziliqhamukisa kulolonke elakuleli,nasemazweni angaphandle, zithuthelane e Inkosi Convention Centre, eThekwini namhlanje, ukuyovalelisa okokugcina kobengumsakazi wo Khozi FM, u Zanele Mbokazi-Nkambule.

U Zanele obengagcini nje ngokuba umsakazi kodwa obephinde abe uSomabhizinisi ohlonishwayo, ongumsunguli wama Crown Awards nama Future Leaders, udlule emhlabeni ngo Msombuluko esibhedlela i Parklands, ngemumva kokuxinwa isifo somdlavuza wamaphaphu. Ukushona kwakhe kunyakazise abaningi, ikakhulu abaculo bowokholo, abangakufihli ukuthi ubesephenduke umzali kubona. Abanye baze bakhalisa umndeni ngenkomo.

Ngale kwezikhulumi ebezishiyelana inkundla, zitusa uthando nenhliziyo enhle kuZanele, nabaculi ebebedumisa kuvuleke iZulu, u- Ndunankulu wakwa Zulu Natal, u Mnu. Thami Ntuli, umhloniphe ngomngcwabo wombuso osesigabeni sesibili. Lolu uhlobo lomngcwabo oluhlinzekwa kuphela labo ababaneqhaza ekwakhiweni kwesizwe. Ibhokisi lakhe liphume e ICC selimbathiswe ifulegi lakuleli. Ufihlwe emathuneni ase Marianhill,e Roma, njengoba bekumenyezelwe phambilini.