UKHEHLELEZI UTHI UMKHUBA USEKHAYA OKHOZINI

Inyanga esizakhele igama kuleli, u Dkt. Khehlelezi, uthi usamile ekutheni umkhuba ungaphakathi  ku Khozi FM, ngokushona kwabasebenzi balo. Ukusho loku kwi video abedlulisa kuyona amazwi enduduzo ngokudlula emhlabeni kuka Zanele Mbokazi- Nkambule, obengaconsi phansi kubalaleli balomsakazo.

Kuzokhumbuleka ukuthi ngesikhathi kushone u BeeKay owayesakaza kuwona lomsakazo, U Dkt. Khehlelezi wazwakalisa ukuthi akuphelile ngokufa kulomsakazo njengoba kukhona abanye abazolandela kungekudala. Wathi omunye uzoshonela esibhedlela,omunye ashone engozini yemoto. Lenkulumo yamdonsela amanzi ngomsele njengoba abaningi bamhlasela ngamazwi, bethi ufuna ukugqama ngo Zanele, okwasekuzwakele ukuthi akaphilile.

 U Dkt. Khehlelezi uthi inkinga ukuthi abantu abamnaki uma ekhuluma. Uthi useyesaba ukukhuluma ngoba uma eke wakhuluma uyagxekwa kodwa uma ebenganikezwa ithuba lokuthi akhulume, kukhona abezokusho. Phambilini wayephakamise ukuthi kube nomkhuleko ozohlanganisa izinkolo ezahlukene, kucelwe ku Mdali nakwabaphansi ukuthi akuvaleke lomkhokha ohlasele kulomsakazo.