ULINDWE INKANTOLO OLIMALE EDUBULANA NAMAPHOYISA

Owesilisa ongowokufika kuleli, ulimale kanzima ngesikhathi edubulana namaphoyisa, endaweni yase Madlankala, eSikhaleni. Lomlisa oneminyaka engamashumi amahlanu nambili ubudala, kuthiwa ubevele efunelwa amacala ahlukene okuthiwa wawenza kulendawo ngonyaka odlule.

Okhulumela amaphoyisa akwa Zulu Natal, u Robert Netshiunda, uthi amaphoyisa alunywe indlebe ngokuthi ungakuphi nokuthe uma efika kulendawo abeyalelwe yona, lomlisa wavulela ngenhlamvu ebhekise kuwona. Amaphoyisa abuyisele ngayo inhlamvu, walimala lomlisa, waphuthunyiswa esibhedlela la eqashwe khona ngeso elibukhali. Alikho iphoyisa elilimalile kulesigameko.

U Netshiunda uthi uma eseluleme lomlisa, uzovela eNkantolo lapho ezobhekana khona namacala ehlukene, okubalwa kuwona elokubulala, elokuzama ukubulala nelokutholakala nesibhamu kanye nezinhlamvu okungekho emthethweni.