UMLINGISI NOHLELO LOKUSIZA ABESILISA

Umlingisi wakuleli uMondli Makhoba uzokwethula uhlelo lukamabonakude okuhloswe ngalo ukusiza abesilisa ukuthi bazithole ukuthi bangobani futhi iyini inhloso yabo empilweni.

Uhlelo olubizwa nge Vuka Mjitha luzoqala ukubonakala ku Mzansi Wethu mhla zingu 14 ku July. Abazoba yingxenye yohlelo, bazothola ithuba lokuthi bazibheke ukuthi bangobani,yiliphi iqhaza abalibambile emindenini yabo kanye nasemiphakathini. Bazophinde babhekane ngqo nezinto abazisabayo nezibahluphayo emphefumulweni bese bethola ukwelashwa komphefumulo.

UMakhoba uyaziwa ngezinkulumo ezakhayo avamise ukunikezela ngazo uma eke wathola inkundla. Uthi kuwumsebenzi wawowonke umuntu ukuthi azithole ukuthi kungani ephila ngoba kunenjongo enkulu.