ZIYANDA IZIGAMEKO ZOKUBULAWA KWABANTU EMIJONDOLO YAKULELI

Inhlangano, Abahlali Basemijondolo, ikhala ngokwanda kwezigameko zokubulawa kwabantu emijondolo yakuleli. Ngempelasonto kudutshulwe, kwabulawa abantu abayisithupha ebebeziphuzela komunye umjondolo osesigcemeni sakwa V, Mlazi.

Okhulumela lenhlangano, uThapelo Mohapi, uthi ziyabakhathaza izigameko zaloluhlobo. Uthi inkinga enkulu ukuthi abahlali basemijondolo abaphathwa njengabantu bakwezinye izindawo,ezifana nasesilungwini. Uthi uma nasemijondolo kungahlale kunamaphoyisa azulazulayo, abheka isimo, zingancipha izigameko zokubulawa kwabantu ngalendlela.

Amaphoyisa athi akukaziwa okuyikona okuholele kulesigameko sase Mlazi futhi  abekho asebeboshiwe.